panganan buka luwur

Sega Jangkrik Lan Bubur Asyura

Dening : Noor Roikhatun N

Sega jangkrik utawa sega menara yaiku panganan kang kudu ana ing wektu buka luwure kanjeng sunan Kudus yaiku antarane tanggal 10 muharrom. Sega jangkrik kui bentuke kaya kepelan sega kang dibungkus godhong jati lan ditaleni karo suwekan pring. Sega jangkrik isine mung sega karo lawuh daging kebo utawa daging wedhus sing dibumbu garang asem. Bumbu garang asem kui sing mula bukane dadi arane jangkrik. Ing panganan sega jangkrik ora menganggo daging sapi amarga ana ing kutha Kudus para wargane isih manut pituture sunan Kudus yaiku ora nyembelih kewan sapi, pramila migunakake daging kebo lan daging wedhus kanggo gentine.

Saliyane sega jangkrik, panganan kang kudu ana ing buka luwure kanjeng sunan Kudus yaiku bubur asyura. Bubur iki digawe saka wolung jinis bahan kang beda-beda, yaiku beras, jagung, dele, tela, tolo, gedhang, kacang ijo, kacang kulit utawa kacang brol. Bahan bahan mau dimasak dadi siji. Bubur asyura ora nganggo piring nalika dicepakake, annging nganggo godhong jati. Ing dhuwure bahan bahan kang wis dimasak mau diwuwuri pentul, cambah, lombok abang, tahu goreng, tempe goreng, teri goreng, urang, lan sapiturute. Pentul kui gorengan kang bentuke bunder tur kagawe saka campuran bahan bahan klapa, daging, gandum, dicampur gula abang, lan ditambah godhong jeruk sing digawe bentuk bunder cilik-cilik banjur digoreng. Bedane bubur assyura lan seg ajangkrik yaiku wektu bandumake. Yen bubur asyura kui dibandumake sedina sedurunge puncak buka luwur yaiku antarane tanggal 9 muharrom lan dibandumake marang tangga teparo, ora kanggo rebutan kaya dene sega jangkrik.