telaah lagu dolanan dhondhong apa salak

Telaah lagu dolanan “dhondhong apa salak”

Telaah lagu dolanan “dhondhong apa salak”

Cakepan

Dhondhong apa salak, duku cilik-cilik

Ngandhong apa mbecak, mlaku timik-timik

Dhondhong apa salak, duku cili-cilik

Ngandhong apa mbecak, mlaku timik-timik

Adhik nderek ibu tindhak menyang pasar

Ora pareng rewel ora pareng nakal

Ibu mengko mesthi mundhut oleh-oleh

Kacang karo roti adhik diparingi

Dhondhong apa salak, duku cilik-cilik

Gendhong apa pundhak aja ngitik-itik

Tembang dolanan dhondhong apa salak saged dipuntelaah saking tembungipun, inggih menika:

Dhondhong.

Tembung dhondhong menika arane salah setunggal woh-wohan ingkang asring dipundadosaken pepindhan kagem tiyang ingkang sae lairipun nanging wonten ing batosipun mboten sae. Dados tembung dhondhong menika maringi pitedah supados sampun ningali tiyang saking njaban utawi bentuk luar kemawon, nanging ugi kedah dipunwigatosaken babagan penggalih sarta patrapipun.

Salak.

Tembung salak menika arane salah setunggal woh-wohan ingkang ugi asring dadosaken pepindhan kagem tiyang ingkang awon lairipun nanging sae batosipun. Sejatosipun tembung menika badhe maringi pitedah supados ningai tiyang kedah saking patrap sara penggalihipun, sampun ngantos kecuwan “menilai” tiyang saking njabanipun kemawon.

Duku.

Duku ugi arane salah setunggal woh-wohan ingkang sae lairipun ugi isenipun, kadosta pralambangipun tiyang ingakang sae lairipun sarta batosipun. Pramila wonten ing tembang menika dipunginakaken pitedah kagem tiyang enem bilih antawisipun dhondhong utawi salak nanging dipunpundhut malah duku ingkang sae njaban utawi lebetipun.

Ngandhong apa mbecak mlaku timik-timik.

Ngandhong kalayan mbecak menika ateges tumindak nanging kanthi pambiyantunipun tiyang sanes.  Nanging saking kekalih menika langkung sae mlaku utawi mlampah kanthi suku piyambak senajan timik-timik utawi alon-alon.

Adik ndherek ibu tindhak menyang pasar.

Tembung menika mratandhakaken padatanipun bocah alit nalika ibunipun tindahak menyang pasar lajeng tumut.

Ora pareng rewel ora pareng nakal.

Menika nggadhahi teges pituturipun ibu kagem putranipun supados sampun ngantos rewel manapa malih nakal nalika nderek ibu tindhakan.

Ibu mengko mesti mundhut oleh-oleh.

Menika pengreh-rehipun ibu kagem putranipun supados keng putra mboten rewel sarta nakal.

Kacang karo roti adhik diparingi.

Menika ngandhut suraos bilih ibu menika mesti maringi hadiah kagem putranipun ingkang purun manut dhateng pitedahipun ibu.

Gendhong apa pundhak aja ngitik-itik.

Menika setunggal piteedah kagem bocah alit ingkang padatanipun nyuwun gendhong supados nalika dipun gendhong sampun ngantos ngitik-itik, sarta mboten pareng murang tata kalayan tiyang ingkang langkung sepuh.

dening: Noor Roikhatun N