tradhisi tahlilan

Slametan Kanthi Tatacara Kudus

Dening : Noor Roikhatun N

Kenduri utawi selametan menika kathah jinisipun, salah setunggalipun inggih menika kenduri nalika mengeti dinten tilar donya. Kenduri menika tradhisi ingkang dipunancas kagem dongakaken para arwah ingkang sampun tilar donya. Wonten ing saperangan kitha kadosta kitha Kudus, tradhisi menika asring dipunwastani  tradhisi tahlilan.

Tradhisi tahlilan menika salah setunggal tradhisi ingkang limrah dipunwontenaken sabibaripun wonten keluarga ingkang nembe tilar donya. Tradhisi tahlilan utawi selametan utawi kenduri menika wonten ingkang nyebat bilih kapundhut saking tradhisi pinda pitre yajna wonten ing agami hindu. Para warga ingkang nganut agami hindhu pitados bilih tiyang ingkang sampun tilar donya lajeng nglampahi “karma” inggih menika kados reinkarnasi dados kewan, wit-witan dewa, lan sanes sanesipun kados amal pedamelanipun. Watawis setunggal ngantos pitung dinten roh ingkng sampun tilar donya menika wangsul malih dhateng dalemipun, semanten ugi nalika ngancik dinten kaping 40, 100, setunggal taun, kalih taun, lan 1000 dinten saking tilar donyanipun. Pramila, para warga ingakng manut agami hindhu ndamel sajen sarta donga arupi mantra mantra supados roh ingkang sampun tilar donya menika saged nglampahi karma kanthi sae.

Upacara Pinda Pitre Yajna menika dipunwiwiti kanthi upacara aghnideya, inggih menika upacara ngobong menyan kagem ngundang roh utawi dewa, kalajengaken upacara nyerahaken sajen arupi panganan sarta omben omben kagem para dewa, lajeng maos mantra mantra supados sedaya ingkang dados kebetahanipun menika saged awujud.

Sasampunipun agami islam mlebet wonten ing tanah jawi, para wali ingkang nyebaraken agami islam sami nggabungaken upacara pinda pitre yajna kalayan agami islam. Inggih menika nggantos sajen kanthi banca’an ingkang dipunbandumaken kalayan tangga tepalih utawi para tamu ingkang sami rawuh ing tradhisi menika. Salajengipun, nggantos upacara ingkang ngagem mantra kanthi acara dedonga sesarengan sarana agami islam inggih menika tahlilan kanthi ngagem donga bahasa arab. Wonten ing kitha Kudus samenika tasih mengeti upacara nelung dina, mitung dina, matang puluh dina, nyatus, nyewu, sarta mendak pisan, mendak pindho lan sanes sanesipun. Sami ugi tatacaranipun, inggih menika sampun ngagem tatacara agami islam. Tatacaranipun inggih menika, dedonga sesarengan ingkang dipunwiwiti kanthi tahlilan, lajeng dipunpungkasi kanthi bandumake sekul berkat. Sekul berkat inggih emnika, sekul ingkang dipunwadahi wonten ing kerdus ingkang dipunbundeli kanthi tali rafia, wosipun inggih menika, sekul, ulam ayam utawi ulam bandeng, sarta jajanan kadosta apem, pisang, ketan, lan sanes-sanesipun.